Vetrarstarfið komið á fullt

Jæja jæja Gufur, smá updait. Helst er það að frétta að vetrastarfið okkar er komið á fullt. Erum þegar búnar að halda einn fund og einn viðburð sem var Réttarkaffið ógurlega. Skemmst er frá því að segja að ekki var tap á því en hefði verið allt í lagi að fá fleiri. Skipulagsfundur var haldin heima hjá Sigrúnu vikuna áður og settum við persónulegt met í fundarhaldi þar sem hann var svo snöggur, málefnin rædd og næstum ekkert slúður og blabla með! Enda við allar mjög uppteknar sveitakonur.

Nú næsta þriðjudag verður svo fundur hér á Ferjubakka II (Miðbæjarkotinu mínu) og er mæting klukkan átta eða 20:00. Verður einungis eitt mál á dagskrá og er það leynilegt (nú verða allar að mæta :)). Ég mun kannski baka eina drulluköku með kaffinu af því að þið eruð allar svo tuskulegar eftir sumarið og verðið að safna smá vetrarforða á ykkur. Ég hvet ykkur allar til að mæta og hlæja að bökunarhæfileikum mínum og ræða skemmtileg mál.

Kveðja af Bakkanum
Ólöf María

Fundur

Jæja, jæja það er komið að því Gufur!!
Jónsmessan nálgast óðfluga og við ætlum að fara af stað með okkar "árlega" Jónsmessuævintýr. Því verður skipulagsfundur núna á miðvikudaginn 23 maí klukkan 20:00 í Valfelli. Það er mjög mikilvægt að við mætum allar því það er margt að gera og mikið að starfa svo allt geti smollið saman vel og vendilega.

Svo mínar ástkæru takið frá miðvikudagskvöldið næsta og mætið í gott spjall í Valfellið okkar!
Sjáumst hressar og kátar með vor í lund
Kveðja Ólöf María

Allt komið á fullt!

Sumarið er tíminn ... segir skáldið og það á aldeilis við um okkur Gufurnar (kosið var um nafn á okkur hreppskonur á síðasta félagsfundi og varð niðurstaðan s.s. sú að félagið myndi heita Gufurnar sbr. Gufuá).

Gufurnar hafa staðið í ströngu það sem af er sumri. Sumardaginn fyrsta var haldið fjölskyldubingó í Valfelli, þar sem vinningar voru aldeilis ekki af verri endanum og dreifðust vinningar nokkuð jafnt á milli spilara... þó vissulega örlaði á að sumir væru heppnari en aðrir. Í hléinu var boðið var upp á kaffisopa, mjólk og rjúkandi vöfflur með rjóma. Sjá mátti glitta í tár á hvarmi nokkurra Gufa og var það vökvi sem lét í ljós stolt og gleði yfir því að 1sta alvöru verkefnið vera að baki.

Pourquoi Pas? Ekki var fyrr búið að vaska upp vöfflujárnin eftir sumardaginn fyrsta, fyrr en næsta verkefni leit dagsins ljós. Safnahúsið stóð að enduropnun sýningarinnar um strand Pourquoi Pas? og hann Sævar var svo elskulegur að bjóða okkur það verkefni að sjá um að veita veitingar því samhliða. Gufurnar gripu það kosta boð að sjálfsögðu, brettu upp ermar og skelltu á sig svuntum og hlaupaskónum og skiptu liði. Ein sá um að dekra við sýningargesti í efra pakkhúsinu í Englendingavík þar sem kaffiaðstaðan var. Ein plantaði sér í bækistöðvum vinstri grænna og stóð þar og skiptist á að laga kaffi og búa til vöfflustafla. Lentum reyndar í byrjunarörðugleikum með rafmagnsmál, en það leystist nú fljótt og greiðlega úr þeim. Sú þriðja var á hlaupaskónum og hljóp með góðgætið á milli húsa og bakaði eða aðstoðaði í veitingasal eftir því sem á þurfti að halda

Ljómandi, alveg ljómandi gott sumar hjá Gufunum, só far.

Kv. Eva

Næsti fundur

Minni ég á næsta fund sem verður þriðjudaginn næsta s.s 20 mars. Ég hef ekki fengið nein svör frá Borgarbyggð í sambandi við Valfell svo við skulum bara hittast hér heima hjá mér að Ferjubakka II. Ég mun hringja í þær sem eru ekki með tölvupóst hinum mun ég bara senda tölvupóst til að minna á.

Smá leiðbeiningar um hvar ég bý; þegar þið hafið komið inn á Ferjubakkabæja afleggjarann þá blasir við hvítt hús með grænu þaki upp á hól, það er mitt hús, svo nú ættu allar að rata :).
Svo sjáumst við bara hressar og kátar á þriðjudaginn.

Kveðja
Ólöf María

8.mars!

Vildi bara óska ykkur til hamingju með daginn dömur mínar!

Kveðjur af kvíunum.
Anna.

Fréttir af húsnæðismálum

Ég sendi eftir farandi bréf til Borgarbyggðar í gær;

Kæra sveitastjórn.

Við erum ný hreyfing kvenna í Borgarhrepp hinum forna sem höfum það að markmiði að auka félagsleg tengsl í hreppnum. Höfum við margt á prjónunum í þeim efnum og má þar nefna meðal annars fjölskylduskemmtun á Jónsmessunni, jólatréskemmtun (sem hefur til nokkurra ára legið niðri í hreppnum), bingó og spilakvöld fyrir alla fjölskylduna og margt, margt fleira. Að sjálfsögðu eru skemmtanir okkar opnar öllum íbúum Borgarbyggðar þó svo upphaflegt markmið sé að auka félagsandann í dreifbýlinu.

Til þess að við getum starfað sem félag þurfum við á fundaraðstöðu að halda og einnig hús til að halda fyrirhugaðar skemmtanir í. Við erum svo heppin að hafa ágætt félagsheimili hér í Borgarhrepp. Valfell er alveg tilvalið til þess konar skemmtana sem við höfum í huga. En því miður er félagsheimilið okkar ekki í nógu góðu ásigkomulagi og vantar margt þar inn sem í dag telst nauðsynlegt til að geta haldið starfsemi í þess konar húsi. Má þar nefna uppþvottavél, ískáp og jafnvel er ekki einu sinni til tappi í eldhúsvaskinum svo á síðasta hreppsmóti mátti gjöra svo vel að vaska upp í bala.

Okkur datt því í hug að bjóða Borgarbyggð að við myndum safna fyrir þessum helstu hlutum sem vantar í Valfell og í staðinn fáum við að halda okkar fundi 1 sinnum í mánuði og allt að 5 uppákomur á ári í húsinu endurgjaldslaust. Við höfðum hugsað okkur að við myndum t.d. byrja á að safna fyrir ískáp þetta árið og svo uppþvottavél á því næsta o.s.fr.

Við teljum að báðir hagsmuna aðilar munu græða á þessu fyrirkomulagi. Ef húsið er í betra ástandi vilja fleiri taka það á leigu, og við sem ný stofnað félag með engan höfuðstól höfum þá húsnæði undir starfsemi okkar.
Því er von okkar að þið bregðist vel og fljótt við bón okkar svo við getum haldið áfram að gera okkar ágæta sveitafélag enn betra.

Fyrir hönd ónefnda menningarfélags kvenna í Borgarhrepp

Ólöf María Brynjarsdóttir
Ferjubakka II

Fékk ég svar í morgun fyrst frá Páli S. Brynjarssyni um það að hann hafi sent fyrirspurn okkar til Guðrúnar Jónsdóttur menningarfulltrúa, hún sendi mér skeyti nokkru síðar um að hún þyrfti nokkurn tíma til að kanna stöðuna en hvatti okkur til að sækja um styrk hjá Menningarsjóði Borgarbyggðar (sem ég sagði henni að við værum nú þegar að gera í svari mínu til hennar) en hún sagði einnig að sú umsókn okkar hefði engin áhrif á það hvort við gerðum svo samstarfsamning við sveitarfélagið um not á Valfelli eða ekki, sem ég var mjög ánægð með. Enda tel ég að þeir græði ekkert síður á því en við að gera þennan samning við okkur.

Sigrún Elíasar er að klára umsóknina fyrir okkur til menningarfélagsins og mun hún skila henni á morgun, er ég ekki með alveg á hreinu hversu háa upphæð hún vænist eftir en var viðmiðið hjá okkur í upphafi 200.000.
Verður vonandi komin niðurstaða í bæði þessi mál á næsta fundi sem er 20. mars n.k.

Ekkert frekar að frétta í bili hér
Ólöf María

Þarf að vera með og prufa líka....

Já ég er svo manísk að ég þarf að prófa líka allt svona nýtt, god ég er svo spennt yfir þessu öllu hjá okkur og er stolt af okkur að vera komnar af stað með þetta, Anna Dröfn þú ert snilli!

Mér datt nú í hug, af því að ég er búin að keyra nokkrar ferðir í Borgarnes í dag með börnin mín á öskudagsböll, að hvernig væri nú ef við héldum okkar eigin öskudagsball? Kannski eitthvað til að stefna að á næsta ári? Komum saman með börnin okkar (jafnvel bara auglýsum) sláum köttinn úr tunnunni, dönsum og syngjum fjölskyldan saman og allir í furðufötum. Gæti verið skemmtilegt, er þa'ggi?

Jæja er búin að prófa líka svo ég get verið rónni.
Heyrumst svo sem fyrst
Kveðja frá Ferjubakka, Ólöf María